Ketua MARA: Alasan Gamer Aceh Meukeuna Mantöng, Meungom-Ngom Meunan


Nasaja Berita – Banda Aceh, Ketua Lembaga Pelestarian Seni Adat dan Budaya Meukuta Alam Raya Aceh (MARA), Teungku Tarmizi Thaib geutanggapi suai peukara berita jitulak fatwa hareum game PUBG lé salah sidroe komunitah gamer Aceh ban-ban nyoe. Meunurôt gopnyan penolakan nyan hana meu alasan. Adakpih na ji peuteubiet alasan, nyan alasan nyang ji peuna-peuna. Lagè jipeugah le komunitaih Gamer Aceh, RGA (Ruang Game Aceh), Rizal.

Meunyo alasan meu'en game nyan jeut keu sarana peu jiôh droe nibak narkoba, meunurot ketua MARA, nyan nakeuh alasan meukeuna mantong, argumentasi nyang hana itamong lam akai warah. Jai that keugiatan laen nyang cocok jingui atawa jipubuet le aneuk muda untuk peu ji'oh droe nibak narkoba, ken ngen game nyan. Meurunoe ilmei ngen kajian kajian atawa keugiatan diskusi laen nyang jeut keu meutamah pengetahuan atawa ngen aktivitas olahraga nyan jiôh leubeh get keu cara peu jiôh narkoba. Bila aneuk muda Aceh geutém jak bak beuet, nyan teuntei leubeh jroh lom dan that meu manfaat.

Peukara hana geulibatkan awak meu'en game watei MPU peugot fatwa nyan, meunurot Tarmizi Thaib nyan hana itamong lam akai sehat. MPU nakeuh saboh Lembaga yang terhormat nyang duek idalam ulama ulama, han santeut baho geujak mupakat ngen ureung meu'en game geujak peugot musyawarah. Saboh contoh, geupeugah le ketua MARA, miseu MPU geuneuk peugot fatwa cambuk keu ureung meu zina atawa nyan hobi mesum, mustahil that that MPU geujak duek pakat ngen ureung hobi meu zina ngen meu mesum.

"Intijih bek peugah haba asai ka meukap igoe yup ngen igoe ateuh sagai".

Keu bhaih surat permohonan awak komunitas gamer Aceh nyang ka jijok keu MPU untuk pakat dialog, Ketua MARA geulakei bak MPU untuk geu anulir dan hana peurlei geujak peureumeun keu permintaan nyan. " Marwah Ulama ji'oh leubeh mulia daripada awaknyan, malei rakyat Aceh meunyoe geujak peugot dialog ngen awak meu'en game nyan", kheun Teungku Ketua.

Lam keuseumpatan nyan, MARA geulakei pihak poemeurintah supaya sigra geutindak lanjuti fatwa MPU nyan beubagah jeut keu qanun, supaya meunyoe na teujadi pelanggaran, kana hukom untuk geucok tindakan ngön hukoman.

"Kamoe pakat mandum sigeunap rakyat Aceh, tokoh-tokoh dan mahasiswa, untuk saban saban tadukong dan takawal fatwa MPU nyang insya Allah jroh donya akhirat nyoe", harap Tarmizi Thaib nyang geudampingi le Sekretaris MARA, Zulhadi ZA, ST, MT.

0 Response to "Ketua MARA: Alasan Gamer Aceh Meukeuna Mantöng, Meungom-Ngom Meunan"

Post a Comment

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel