Viral Video CCTV, Ambulance Gerindra Bagi-Bagi Peng Keu Awak Demo Pipel Powe


Nasaja Berita - Banda Aceh, Jadi nyo dari phon kon ju Apa peugah beh. Nyo kon Apa jak peubrok atawa jak peudaleh pulan-pulen. Tapi nyo nakeuh saboh berita nyang teungoh viral lam padum uroe nyo nibak Yutub. Jadi Apa peu ek keu berita mangat neuteupu.


Jadi lam video nyang viral nyan, sumber jih dari CCTV bak Bali Tower di Jakarta. Kon di Pulo Bali. Bek salah eunteuk, dari phon ka dawa. Demo di Jakarta, keupu ta pateh CCTV Bali. That geup'uep daih kiraju meunyo troh bak ayat nyan suah ta surah.


beh ka, jadi lam video nyan, na saboh tumpok massa nyang ikot bak acara demo pipel power baroesa di Jakarta. Nyang karu ji teumimbak peulisi dan na leupah jai luka-luka ureung dum. Pipel Power nyan jak demo tuntut KPU dan awak Jokowi curang seulama Pilpres. Nyan pipel powe, bek kadang eunteuk na nyang hana meuphom lom.


Jadi bak tumpok ureung nyan, troh moto Ambulance deungon na logo partai Gerindra, Partai pimpinan Pak Prabowo Subianto. Troh keunan ji rhem ambulance nyan sinan, ji teubiet ureung lam ambulance, jibagi-bagi amplop. Teuman na nyang peugah nyan jibagi peng. Han mungken amplop soh.

Meunyo memang keubiet nyoe meunan asoe video nyan, beurarti ka beutoi lagee jipeugah le awak peulisi baroesa nyang bahwa na massa bayaran. Nyangkeuh nyan nyag awak peugot karu. Gara-gara awaknyan seureutoh, karu ureung meuribe-ribe lam acara aksi damai pipel powe. hai peulisi meunan ji peugah. Makajih abeh jibeureukah mandum. Nyang keunong seupot ak peulisi, lagee haba itu ju. Ka karu lam kawan ramee, kakeuh soe-soe nyang na di keu ju.

Teuman pu keuh keubiet nyoe nyan awak Gerindra pih hom. Atawa kadang soe aleh nyang pinjam moto ambulance nyan siat jijak keunan bak tumpok ureung nyan. Ata yang jibagi nyan kon peng, tapi ubat. Pu ubat pih hom. Atawa kadang nyan sit rukok jibagi-bagi saboh bungkoh sapoe. Di super keunan ijak p'iep rukok. Meunyo sideh kadang na bos jih, ji peucat meunyo jiteupu p'iep rukok. Kadang na bos nyang meunan seubab nah. Intelijen Bageudad nyang keurija keu Nasaja Berita teungoh ji woe u gampong malam nyan, jak Nuzulul Quran.

Seubab meunurot lam kronologi calitra ureung nyang na di sideh, pu keuh peulisi atawa ureung demo, lam poh dumnan nyakni poh 2 malam kureung siangen nyan hana lom karu. Lheuh jibagi-bagi amplop nyan baro karu, watee ka poh 2 lewat siangen. That pangeh teuh.

Seubab haba nyang viral teukaet video nyan jipeugah. Lheuh jibagi peng, langsong ji provokasi, ji peupanaih awak peulisi. Jirhom aneuk batee, jiteunak, ji ini, ji itu. Supaya peulisi meungamok. Meunan meungamok keubiet tan jiturie sarie, asai leumah di keu mata jihambo saja. Makajih demo pipel powe nyan rhet keu karu. Meunan haba nyang viral, berdasarkan video nyang viral nyan. Si go treuk, nyan kon haba Apa beh, bek meudaleh keu Apa. E han neu pateh Apa peugah neu klik ju bak video nyan. Meuhan bak GridHot.id jeut sit. Meuhan bak pesbuk si gam panyang ok Ulin Yusron jeut sit, atawa neucukeh bak Video nyo jeut sit.

0 Response to "Viral Video CCTV, Ambulance Gerindra Bagi-Bagi Peng Keu Awak Demo Pipel Powe"

Post a Comment

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel